Ka vdekur Bilall Kqiku, njëri prej të dyshuarve për vrasjen në mars të vitit 2024 në Kolovicë, i cili duke tentuar t’i ikë arrestimit nga Policia e Kosovës ra nga kati i katërt i një ndërtese në Lagjen e Spitalit në Prishtinë.

Lajmin për Arbresh.info e ka konfirmuar, Shaqir Uka, shef i Klinikës Intensive në QKUK.

“Po, fatkeqësisht pacienti që ju i referoheni nuk ka arrit me ju përballue lëndimeve që ka pësue dhe i njëjti ka ndërrue jetë.”, tha Uka.

Policia e Kosovës kishte bërë të ditur se Kqiku në përpjekje për t’iu shmangur arrestimit policor, ka rënë nga një lartësi dhe për pasojë ka pësuar lëndime trupore.

“Sot rreth orës 20:30, në lagjen e Spitalit në Prishtinë, një person ka rënë nga lartësia e një ndërtese. Bazuar në informacionet e para nga vendi i ngjarjes, i dyshuari i cili po kërkohej me urdhër-arrest vendor dhe ndërkombëtar, për veprën penale vrasje e rëndë, në përpjekje për t’iu shmangur arrestimit policor, ka rënë nga një lartësi dhe për pasojë ka pësuar lëndime trupore.”, thuhej në njoftimin e policisë të datës 10 korrik.

Sipas njoftimit atij i ishte ofruar tretmani mjekësor, për tu transferuar më pas në QKUK.

“Aktualisht policia, në bashkëpunim me akterët e tjerë përkatës, janë duke ndërmarrë të gjitha veprimet e nevojshme për zbardhjen e plotë të rrethanave të ngjarjes.”, thuhej në njoftim.

27 vjeçari ka pasur urdhërarrest ndërkombëtar dhe vendor./Arbresh.info/

LEXO EDHE:

Raportohet se ka vdekur i dyshuari që ra nga kati i katërt i banesës duke ikur nga policia